البارحه عديت بأعلى المراقيب!!!!

بسم الله الرحمن الرحيم

مسائكم ورد
أظع بين أيديكم بعض الحقايق
التي تحمل بين سطورها مايعني لي الشي الكثير .
أتمنى أن تلامس شيئآ من ذايقتكم الراقيه.

البارحه عديت بأعلى المراقيب
مرقاب غين ماذكر من رقابه
ماقدمي الا جرة الطير والذيب
واللا البشر مافيه حين وطابه
أرقب على وديان وجبال وشعيب
وأسمع صدى صوتي بصوت الذيابه
برد ومطر وخيال جاله مناصيب
دفاي برقه وأرتوي من سحابه
راحت بي فكاري شمالن بتغريب
والماضي اللي فات فكيت بابه
وين أنت يامشكاي شوق الرعابيب
ياشوق من ترسم بيدها الخضابه
فالوقت عشت أيام فيها تعاجيب
ولاطال ليلي هم قلبي سرابه
عفت الجلوس وعفت صاف المشاريب
يومن وسط الصدر مثل الحرابه
أنا أتحرى الطيب من راعي الطيب
اللي كسب طيبه من أول شبابه
من يمكم ماعاد جتنا مكاتيب
وأنا أتحرى من طرفك الكتابه
ياصاحبي وقتن مضا ماهو صعيب
ودي بسجات القدم والدعابه
إليا تخاوى الجيب مع راعي الجيب
وخويهم طاروق الأبيات جابه
صوت كفراته حنة الشمخ النيب
اليا إستوى مع خط ثم إنحنابه
على طرف عدن من المرتع تعيب
ومن الظما حنينها به تشابه
إنكانه أسقاها عطيب المظاريب
لابد ماترتع بهاك الشعابه
تطيب لو تال الدلو به حثاريب
وتعود يممه ويتصففى شرابه
ماني من اللي مره يشاف ويغيب
وإن شيف ما أحدن ينشده عن غيابه
وصفت باللي فات حرش العراقيب
ولافيه يامشكاي غيرك درابه
رسالتن بين الظلوع المحاديب
سؤال وأبي من طرفك الإجابه

تقبلو عبدالعزيز المرزوقي